اوعى تقف لبنت فى المترو

دلوقتى الأخت سحر الجعارة تطلع تقول ان المرأة لها نفس حقوق الرجل في المجتمع،



والأخت إيناس الدغيدى تطلع تقول ان الراجل همجى مش بيعرف في المرأة غير جسمها،




والأخت إقبال بركة تقول إن مصدر جمال المرأة هو عقلها مش جسدها ولازم التعامل معاها كعقل بدون النظر إلى الجسد هيه عاملة فيه ايه.. ده باعتبار ان الواحدة تبقى ماشية في الشارع وواحد بقى يعاكسها يا ابو عقل جامد..ياواد انت ياابو مخيخ ..حوش شعرك عشان نشوف جمال عقلك يا قمر
والواحد بقى يكلم صاحبه وهما شايفين بنت ماشية..شفت ياد العقل اللى لابس أحمر ده؟؟ !!
كل الكلام ده ماشى



والأخت هالة سرحان بيجيلها تخلف عقلى لو سمعت ان راجل قال لمراته حضَّرى العَشا..باعتبار ان العشا رجس من عمل الشيطان !!




والأخت العزيزة سعاد حسنى تقول البنت زى الولد ماهيش كمالة عدد..ومش عارف مين قال ان البنت كمالة؟؟ !!
البنت طبق كشرى بحاله من الكبير ابو تلاتة جنيه.. زيه زى الولد بالظبط




والأخت عبير صبرى ربنا يهديها تقول ازاى الراجل المتوحش القاسى التنين اللى بيطلع نار من مناخيره بيتعامل مع الأنثى اللى هيه نسمة ماشية ع الأرض يا ولداه !!



طبعا انا باعدى الكلام ده لأنى عارف الولد المحترم بيعامل البنت المحترمة ازاى.. والزوج المحترم بيعامل الزوجة المحترمة ازاى ومش محتاجين نصايح اسم الله على جمالهم وأدبهم

المشكلة بقى مادام بيقولوا البنت زى الولد.. ليه الولد بيقف في المترو عشانهم بقى؟؟ أيوة اوعى تمشى استنى..دى مشكلة كبيرة مش صغيرة..يعنى الولد لما يركب المترو كام مرة في اليوم وكل مرة اكتشف انه لازم اقف عشانهم تبقى مشكلة





يدخل المترو في أمان الله ويقعد بعد جهد جهيد وهو شايف واحدة موظفة مع صاحبتها راجعين من الشغل وصحتهم زى الفل.. وقاعدة تحكى لها ازاى تعمل محشى الكوسة وقاعدة تقور في الهوا يمين وشمال عشان يبقى الشرح عملى وصوتها عالى.. واول ما تدخل المترو تلاقى الشلل الرعاش حلّ عليها.. وعينيها مش قادرة تفتح من الإرهاق وتيجى هيه وصاحبتها قدامه بالظبط وتعلـّى صوتها



وتقول لصاحبتها:


معدتش باقدر أقف كتير يا سنية..


ترد عليها زميلتها واللبانة ف بقها:



ومين سمعك يا حبيبتشى..


الدكتشور قال لى انى لو وقفت على رجلى خمس دقايق هارجًّع ع اللى قدامى علطول





وللا البنت اللى لسة شباب.. تبقى قاعد لا بيك ولا عليك وتلقى المحروسة داخلة المترو .. بنت حلوة وشعرها ع الخدود يهفهف ويرجع يطير.. وتيجى تقف قدامك.. وفجأة تفضل تظبط شعرها وترميه ورا ضهرها زى إعلان صابون كامى عطر فرنسى الإيحاء..ومتوقعة ان الزبون اللى هوه اواد المحترم الغلبان هيقوم يبوس ايديها انها تقعد مكانه.. والله لو خلعت شعرها كله وادتهولك على سبيل المقايضة زى قدماء المصريين..برضه مش اوعى تقوم


وبعدين الأول كانت عربيات السيدات في المترو قدام ومع ذلك كانوا منتشرين في كل العربيات وقلنا ماشى..بعد ماحصلت حادثة مترو حلوان البسيطة اول المترو.. قالوا لا .. هاتوا السيدات في نص المترو..ليه بقى؟؟



ده باعتبار ان لو حادثة حصلت في أول المترو والسيدات قدام هيصوتوا ويلموا الدنيا انما الرجالة بتموت من سكات!!!صلاة النبى


طب حد مننا اعترض ان السيدات ماليين مترو الرجالة.. أبدا..انما شوف بقى ياعم الحاج لو حظك الأغبر وقعك انك ركبت سهوا في عربية السيدات..ياداهية دقى..تسمع بقى أحلى كلام.. أولا..سوفاااج..سوهاج..راجل؟؟..واللى تحط وشها في الأرض من الكسوف..واللى تقول أوووه.. راجل..فانتستيك..صلاة النبى..




انتى عمرك ماشفتى راجل ياضنايا؟؟؟مش برضه انتى جاية من شغلك وهوه هناك وراجعة بيتك هتلاقى واحد من نفس الفيرجن في وشك زى القضا المستعجل


والبنت اللى في الجامعة آه لو شافت راجل في المترو.. هيغمى عليها من الخضة..


ماانتى لسة جاية من الجامعة وكنتى انتى والولاد قاعدين تلعبوا صلح وعسكر و*****ة.. عمرك ماشفتى راجل يا شابة؟؟؟




أيوة مادام فيه مساواة تبقى ف كل حاجة.

. زى ما الولد بيشتغل وهيه بتشتغل.. يبقى اللى يلحق الكرسى يقعد باعتبار انها إبراهيم ابن خالته يعنى عادى ..ومادام فيه مساواة ولازم نتعامل مع عقل البنت.. يبقى بلاش تلعب فى شعرها وتورينك دايما انها بتحط هيد أندشولدرز ضد القشرة عشان تقم..لأنها زى ما بتحط هيد أندشولدرز الولد بيحط برضه هيد أنشولدرز ومن الحجم الكبير كمان أبو عشرين جنيه..


انا مش بقول انك متقمش خالص

.بس قوم عشان حد يستاهل.. يعنى ست كبيرة مريضة.. راجل عجوز تعبان.. ست شايلة تسع عيال على ايديها..كده يعنى.. حالات تستاهل.. انما واحدة عندها تلاتين اربعين سنة وقاعدة عاملالى فيها حسين رياض لما اتخرس في رد قلبى.. أقف ليها ليه؟؟






وكمان شوف الموقف ده.. بقى ينفع الواد يقف عشان واحدة ست تقعد..ويقف جنبها..وأول ما تيجى تنزل محطتها تشاور لاقرب بنت أو ست عشان تقعد مكانها!! صلاة النبى..حتى الكرسى بيتورث يا جدعان؟؟ خيال مآتة واقف جنب الكرسى ؟؟؟دا واقف عشانك..طب خليها بجميلة حتى..وموقف ورا موقف تكتشف في لحظة ان كل الستات والبنات قاعدين..وكل الرجالة ماسكين جرايد وقاعدين يهووا عليهم:
ألف ليلة وليلة.. قصة كل ليلة..احكى ياشهرزاد.. احكى لشهريار


وللا البنت اللى تيجى تقعد جنبك ومش طايقة نفسها قال إيه المكان ضيق ومش قادرة تقعد مرتاحة..


طب ما دام انتى متضايقة كده ماتقومى تقفى بلاش القعدة المقرفة دى.. وللا يعنى عشان كل مرة واحد محترم شباب هوه اللى يقف عشان المكان يوسع للهانم.. أم طاقية.. طاقية حمرا.. للهانم البيضا.. والهانم السمرا

الله يخرب بيت هالة وإيناس وسحر وعبير وإقبال وكل اللى عقدونا ف عيشتنا بكلامهم اللى محدش بيأيده

.بيطالبوا بحقوق المرأة اللى على كيفهم.. مع ان ديننا جعل المرأة جوهرة يتحافظ عليها وتتعامل أحسن معاملة مش سلعة وموضوع في كل برنامج شوية.لو كنت قاعد على كرسى في المترو.. دايما حاول انك تربط رباط جزمتك وانت قاعد لمدة العشرين محطة اللى انت راكبهم وماتبصش لأى حد واقف عشان قلبك الطيب


ارجو ان تنال اعجابكم يا بنات

هههههههههههههههههههههههه بجد مت من الضحك سامح

مش ممكن بس فعلا منهم لله ال حرية المراءة ال

دينا الحنيف حفظ للمراءة كرامتها وحريتها

بل دعواتهم المشينة تسئ للمراءة اكثر

تسلم يا سامح على الموضوع اللى يجنن دا

تقبل مرورى

ههههههههههه تسلم ايدك حبيبي على الموضوع يارب دايما فى تقدم

لسانى عاجز عن الكلام بعد سماع الردود الجميلة دى
وطبعا انا اتشرفت بمروركم تسلمولى يا رب

هههههههههههههههههههههههههههههههههههههههه

بجد والله انا موت على نفسى من الضحك والله مواضيعك كلها متميزه

جدا وديما باداءك الجميل فى اظهار الموضوع بشكل واقعى بجد متميز

تسلم سامح بجد على مواضيعك اللى كلها ديما بتخلينى اضحك

وديما منور المنتدى

تقبل مرورى

بيرو بيرو
دايما منور مواضيعى بردودك الجميلة
ومنورة المنتدى كلة بصفة عامة
طبعا مرورك اسعدنى كتير
بس دة طبعا مش هيمنع انى لما هشوفك فى المترو مش هقف بردو ض1
هههههههههههههههه

لا بجد موضوع واقعى ملوش حل ههههههههه ... ديما فى كل وقت بس هيهات تبقى قبلنى ...... بص اقلك على طريقه حلوة
اول لما تقعد طلع اى حاجه معاك وقلم ... كتاب مجله جرنان
واعمل نفسك ولا كانك نجيب محفوظ وخلاص هتقطع الكتاب من المذاكره .... عشان وراك امتحان مهم اوى ...... سعتها ولا اى حد هيفكر فى الكرسى ههههههههه
بجد موضوع جامد سامح تسلم ايدك ....