يوميات مصري معذب

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى


عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت


عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف
منقول



مع تحفظي
لانه مش لانك مصري
لان ده مش ذنب مصر
دا ذنب اللي ظالمينها
واللي ساكتين علي الظلم ده

اكيد ده مش ذنب مصر فعلا

مش عارف ليه دايما المصرى فى كل مكان مهان

واديكى مثال مباراه مصر والجزائر

اضربنا فى مصر وخارج مصر وايه اللى اتعمل ولا حاجه

مباراه الاهلى وشبيبه القبائل الحكومه كانت بتضرب اللعيبه

احنا شعب متهان بره وجوه

تسلم ايدك غنوه

تفبلى مرورى

تسلم اتش علي مرورك
والمصري فعلا مهان بره وجوه زي ما قولت
والحكايه مش مقتصره علي ماتشات الكوره بس
لكن في كل المجالات ومن وقت للتاني بنسمع عن اشكال وطرق كتير من الاهانه
ودا لان ببساطه المواطن عشان تكون كرامته مصانه لازم تكون وراه حكومه تحافظ علي هذه الكرامه وتهب لنجدة مواطنيها اذا وقع عليهم ظلم في اي مكان عن طريق البعثات الدبلوماسيه المسئوله عن رعاية المواطنين بالخارج
لكن للاسف في حالة المصري لا يجد من يسال عنه
بل بالعكس هو ممتهن الكرامه في الداخل وعلي ارض وطنه بيد من هم من المفترض ان يكونو في خدمته
فاذا كانت الكرامه ممتهنه في الداخل فمن الطبيعي الا تجد من يصونها في الخارج
تسلم اتش مره تانيه علي مرورك

ميرسي يا هنا علي مرورك
ويا رب دايما منوراني وتسعديني بارائك
وطبعا يا هنا احنا علينا جزء كبيييييير من الذنب
وده كان قصدي بالتحفظ اللي انا قولته
ان ده مش ذنب مصر
دا ذنب اللي ظالمينها
والأكتر ذنب اللي ساااااااااااكتيييييييين علي الظلم ده

ميرسي يا هنا مره تانيه علي مرورك