[img]
[/img]
حكايه كل شباب انهارده .. هنشوفها في شخص سمسم الطالب الجامعي المتخرج من 4 سنين من صيدله السنبلاوين .. و حبيبته سمسمه, بكالوريوس هندسه قسم ( كهربه أفراح ) !
سمسم تتجوزيني ؟
سمسمه ـ أفندم ؟
سمسم ـ بقولك تتجوزيني ؟
سمسمه ـ !!!!!
سمسم ـ تتجوزيني ؟
سمسمه ـ لا !
سمسم ـ ليه ؟
سمسمه ـ بصراحة كدة شكلك مش عاجبني ..
سمسم ـ إزاي يعني ؟
سمسمه ـ يعني .. أصل أنا ليا مواصفات معينة لفارس أحلامي .
سمسم ـ مواصفات معينة ؟ .. هو انتي هتتجوزي عربية ؟
سمسمه ـ لا ! .. بصراحة كدة .. إنت مش فارس أحلامي اللي باتمناه !
*****
سمسم ـ تتجوزيني ؟
سمسمه ـ إيه ده ؟ شكلك اتغير !
سمسم ـ إيه رأيك ؟
سمسمه ـ واو .. شعرك بقة ناعم ! .. دي باروكة ؟
سمسم ـ أيوة
سمسمه ـ ودي عدسات خضراء ؟
سمسم ـ أيوة
سمسمه ـ واو ! .. بس بجد .. بقيت وسيم .. واو ! ده انت بقيت شبه نيكولاس كيج !
سمسم ـ مين عباس كيج ده ؟
سمسمه ـ عباس ؟!! ياي .. إيه عباس دي ؟ اسمه نيكولاس ..
سمسم ـ مين نيكولاس ده ؟
سمسمه ـ بقة مالكشي في السيما وجاي تكلمني ؟ .. ياي !
*****
سمسم ـ تتجوزيني ؟
سمسمه ـ انت لسة ليك عين تكلمني ؟
سمسم ـ أيوة .. أنا عرفت مين بنكرياس كيج ده
سمسمه ـ أولاً : اسمه نيكولاس كيج ..
سمسم ـ أيوة أيوة .. كنت هاقول اسمه صح .. بس اختصرته .. ده ممثل
سمسمه ـ ممثل إيه ؟
سمسم ـ ممثل أمريكاوي
سمسمه ـ أمريكاوي ؟! .. إخّييي ! .. اسمه أميريكان يا بابا .. ما تبقاش
دونكي
سمسم ـ دونكي دي تبقى شتيمة ؟
سمسمه ـ أوف كورس
*****
سمسم ـ تتجوزيني ؟
سمسمه ـ عندك عربية موديل كام ؟
سمسم ـ موديل دي تبقى شتيمة ؟
*****
سمسم ـ تتجوزيني ؟
سمسمه ـ قوللي الأول .. حاطط أنهي نغمة في الموبايل بتاعك ؟
سمسم ـ نغمة دي تبقى شتيمة ؟
*****
سمسم ـ تتجوزيني ؟
سمسمه ـ ما قلتليش .. إنت بتشتغل إيه ؟
سمسم ـ أنا -بلا فخر- عاطل
سمسمه ـ عاطل ؟ .. ياي ! ..
سمسم ـ مش أحسن من اللي ما بيشتغلش ؟
سمسمه ـ لا
سمسم ـ يعني مش هتتجوزيني ؟
سمسمه ـ لا يا ميزو
سمسم ـ كدة أنا أزعل
سمسمه ـ ما تزعلش يا بابا .. خليك فريش
سمسم ـ ماشي .. ماشي .. بس قوليلي ..
سمسمه ـ إيه ؟
سمسم ـ فريش دي تبقى شتيمة ؟
*****
سمسم ـ تتجوزيني ؟
سمسمه ـ لقيت شغل ؟
سمسم ـ أيوة طبعًا .. سنتين وأنا بادور .. أخيرًا لقيت ..
سمسمه ـ وإيه هو ؟
سمسم ـ سواق تاكسي .
سمسمه ـ ياي ! .. مش مكسوف وانت بتقولها ؟
سمسم ـ فيها إيه ؟ العمل شرف .. وكلها كام سنة وأجمع مبلغ كويس ..
سمسمه ـ شرف ؟ جتك القرف !
*****
سمسم ـ تتجوزيني ؟
سمسمه ـ جمعت مبلغ كويس ؟
سمسم ـ طبعًا .. مبلغ كبير جدًا ..
سمسمه ـ قد إيه يعني ؟
سمسم ـ ألف جنيه
سمسمه ـ نعم ؟!!! .. ألف جنيه دول تروح تسرح بيهم ببطاطا ..
سمسم ـ يعني موافقة ؟
سمسمه ـ روح اتنيل .
*****
سمسم ـ تتجوزيني ؟
سمسمه ـ عندك شقة ؟
سمسم ـ طبعًا .. أودة على السطوح ..
سمسمه ـ نعم ؟!! ..
سمسم ـ إيه المشكلة ؟! .. أحسن ما ننام في الشارع !
سمسمه ـ في الشارع ؟! .. إيه الألفاظ السوقية دي ؟! ياي ! .. لازم يا بابا تجيب
شقة .
سمسم ـ طيب .. كلها كام سنة وأجيبلك أحسن شقة في الدنيا .
سمسمه ـ وهتجيبها في جاردن سيتي ولا في الزمالك ؟
سمسم ـ لا .. في الأهلي .. هيهع هيهع هيهع !
*****
( بعد سنوات) :
سمسم ـ تتجوزيني ؟
سمسمه ـ جبت الشقة ؟
سمسم ـ أيوة .. الحكومة بتبني شقق للشباب وأنا خدت شقة .. صحيح إنها اتأخرت
لسبع سنوات .. لكن المهم إنها جات ..
سمسمه ـ فانتاستيك
سمسم ـ بس الشقة ناقصة حاجة .
سمسمه ـ إيه هي ؟
سمسم ـ مفيهاش حمام !
سمسمه ـ امشي من قدامي ! .. مش طايقاك !
*****
سمسم ـ تتجوزيني ؟
سمسمه ـ إنت تاني ؟
سمسم ـ جبتلك حمّام إنما إيه
سمسمه ـ خليه ينفعك
سمسم ـ ليه بس ؟ .. ده ينفع لينا احنا الاتنين
سمسمه ـ وأنا مالي ؟
سمسم ـ مش عاجبك .. مش مشكلة .. أكتبه باسمك
*****
(بعد سنين) ..
سمسم ـ هتتجوزيني ولا أولع فيكي ؟
سمسمه ـ ومالك محروق كدة ؟
سمسم ـ حكايتنا طولت قوي .. طولت أكتر من اللازم
سمسمه ـ أوكي .. بس ممكن أعرف حاجة ؟
سمسم ـ إيه ؟
سمسمه ـ إنت ليه متمسك بيا أوي كدة يا مزمز ؟
سمسم ـ أصل .. أصل ..
سمسمه ـ أصل إيه ؟
سمسم ـ أصل أنا بحُبك (بضم الحاء) !
سمسمه ـ بحُبك ؟!! .. إيه بحُبك دي ؟! .. إسمها بحِبك (بكسر الحاء) ! ..
وبعدين خليك روش وقول : I love you
سمسم ـ ماشي .. بس قوليلي ..
سمسمه ـ نعم ؟
سمسم ـ روش دي تبقى شتيمة ؟
*****
سمسم ـ تتجوزيني ؟
سمسمه ـ بصراحة .. في حاجة كنت عاوزة أقولهالك من زمااااااان يا ميزو .
سمسم ـ إيه ؟
سمسمه ـ أنا بصراحة .. مش شايفة إن في حد في العالم يستاهلني
سمسم ـ يا سلام ! .. ليه ؟
سمسمه ـ عشان أنا جميلة .. خفيفة الدم .. رشيقة .. رقيقة ..
سمسم ـ رقيقة ؟! .. ده انت بدأتي تقشفي
سمسمه ـ فشر !
سمسم ـ فوقي لنفسك .. العمر بيجري ..
سمسمه ـ أنا مصرة على رأيي
سمسم ـ يعني إيه ؟
سمسمه ـ يعني اقطع معايا
سمسم ـ بعد كل السنين دي ؟! .. بعد كل الحب ده ؟!!
سمسمه ـ بلاش تراجيديا من فضلك
سمسم ـ ماشي .. بس قبل ما أمشي عاوز أسألك سؤال واحد بس ..
سمسمه ـ إيه هو ؟
سمسم ـ تراجيديا دي تبقى شتيمة ؟
*****
( بعد سنوات ) ..
سمسم ـ تتجوشيني ؟
سمسمه ـ إيه ؟
سمسم ـ تتجوشييينييييييي ؟
سمسمه ـ إنت مين ؟
سمسم ـ أنا حبيبك يا هبلة .. البشي النضارة عشان تشوفيني
سمسمه ـ طيب شاعدني عشان ألاقي النضارة
سمسم ـ آهي على الترابيزة قدامك
سمسمه ـ فين ؟!!
سمسم ـ لا دي نظارتي أنا
سمسمه ـ أيوة لقيتها ..
سمسم ـ البشيها بقة
سمسمه ـ ططييبب
سمسم ـ عينيكي فوق شوية يا سماسم .. ده بقك ..
سمسمه ـ طيب لبشهالي إنت
سمسم ـ عقبال ما البشك الدبلة
سمسمه ـ ما تكشفنيش يا ميشو بقي .. كنت بتقول إيه بقى ؟
سمسم ـ كنت بقول تتجوشششيييينيييييي ؟
سمسمه ـ أكوشك ؟ .. إزاي ؟
سمسم ـ يا ولية مش تكوشيني .. تـ .. تـ .. جـ .. و.. شـ .. يـ .. نـ .. ي ؟
سمسمه دي شتيمة ؟
سمسم لاااااء .. بقولك تتجوشيني ؟
سمسمه ـ آه !! .. أجوشك
سمسم ـ بالضااااابط .. هاه ؟
سمسمه ـ شيبني أفكر
سمسم ـ أشيبك تفكري ؟! .. ده انت هتموتي خلاش !
سمسمه ـ لا .. شيبني أفكر بش
سمسم ـ ربنا يوفقك
سمسمه ـ إيه ؟
سمسم ـ ربنا يوفقك
سمسمه ـ بتقول إيه ؟
سمسم ـ ربنا ياخدك
*****
(على فراش الموت) :
سمسم ـ تـ … كوح .. كوح .. تتـ .. كوح كاح كيح .. تتكو .. كوح .. كوح ..
تتكوشـ .. كوح كوح .. يني ؟
سمسمه ـ مش شامعة
سمسم ـ بـ .. قوللـ .. كوح .. كوح .. بقولك .. تـ .. تـ .. كوح .. كوح .. تتجوشيـ .. ؟ كوح .. كوح …….
سمسمه ـ أجوش مين ؟!!!
سمسم ـ هـ .. و.. ه .. كووح كوح كاح .. هوه إنتي .. كوح كوح .. معرفتيـ .. ش .. كوح كوح كيح .. ميـ .. كوح .. مين ؟!!
سمسمه ـ إيه ؟ ..
سمسم ـ لا .. كوح .. أبدًا .. كوح .. كنت … كح كح .. بأكح
سمسمه ـ كنت بتكح ؟!!!! .. شلامتك .. ما قلتليش ليه ؟
سمسم ـ هو .. كوح .. إنتي .. لشة .. عارفـ .. ـة .. كوح كوح
سمسمه ـ بتقول إيه ؟
سمسم ـ يا .. ولية .. كوح كوح .. ردي .. كوح كوح .. عليا .. تـ .. تـ .. جو.. شيـ .. كوح كوح كوح كوح .. نـي ؟
سمسمه ـ أجوشك ؟!! .. طب بش خد الدوا الأول
سمسم ـ يا وليـ .. ـة .. كوح .. كوح .. أنا .. كوح .. كوح .. هتتجوشيـ .. كوح
كوح كوح .. ـني ؟
سمسمه ـ أيوة يا حاج .. موافقة .. موافقة إنك تتكوشني ..
سمسم ـ أخيـ….كوح كوح ..راااااً !! .. كوح كوح .. كدة أموت .. كوح ..
كوح .. وأنا .. كوح .. مطمئن ومرتاح .. الودااا .. كوح ..ع ع ع ع
سمسمه ـ يا حاج .. يا حاج ..
لااااااااااااااااااااااااااااا !!
*****
التقيم : 
موضوع: سمسم _ وسمسمة حكاية كل شاب وفتاة فى الدنيا 
السبت 16 أكتوبر - 6:42:58
