قهوة وسوالف عزوبي

مساء الخير على الكل




ومسا الخير على الصاحي ومساء الخير على النايم , ومساء الخير عليك يالرض
بدا الشتا وبدا جو الرياض يبرد وبدينا نحمي مواترنا ونخليها شغالة ربع ساعة برا عشان يحتمي زيتها والبنزين ياخذ لفه بالمكينة

وبديت اطلع بجامتي المقطنة كل سنة هذيك اللي لونها اصفر .

أمي دايم توصيني تقول وانا امك بالبرد تنسد نفسك عن العيشة , يا وليدي امش اكل وشاور ضرسك ولا تشاور نفسك . والمعذرة دايم ضروسي يا ست الحبايب
تضيمني وبها حفريات كهرب واصلة راسي !


هذاك اليوم
قدر الله وتضرب معي اربع ضروس تحت واربع ضروس فوق وانا افتش مخباي والقى لي صرافة بنك اهلي منعفطة مع النص ! وقلت ريحة ابو زيد ولا عدمه وانا اروح والله واسحب ألف ريال واروح بعدها لعيادة اسنان .. وأوصل عن الاستقبال الا هو ولد اجيويد واقوله عندكم سباك ضروس ؟ ابيه ينتف ضروسي كلها ماعاد ابيها لانرقد ولانعيٌن خير قال اصبر وهو يطقطق بكمبيوترة وقال فيه دكتورة فاضية قلت يا اخوي دخلني بس وانا ادخل على الدكتورة واحذف شماغي وعقالي على الكرسي اللي جنبها وافكفك ازرة ثوبي .. الا اشوف وجهها ! مرتاعة تحسبني بأفصخ وانا اقولها استريحي بس
انت وعبله كامل نفس الخشة مير تعالي جبي دريلك وزراديتك وابرك والعدة كاملة وامشي اشتغل بفمي


* قالت لي افتح فمك ويوم فتحة فمي لها الا اشوف وجهها كشٌر ! دريت انها تبي تلعن اصلي
سكتت شوي وقالت , عندك اعناق اسنان متسوسة , وعندك التهاب حاد باللثة , وعندك الضرس الخلفي ملتهب العصب حقة , وعندك حاجات منيٌلة وستين نيلة قلت لها .. آآآآ دلالة على اني ابي اصك فمي واتكلم
قلت كل هذا في فمي ؟ وبضروسي الا وش رايك تقصين فمي كلٌه ؟ وارتاح منه !
قالت ماتخفش بالنسبة للسعر حاراعيك يا اوستاز .. وباخذ منك على الشغل كلة 6 ضروس 600 ريال بس
يوم دقت الأبرة حقت البنج ! مامسك البنج ولا تخدرت ضروسي
وانا اقولها لاتحفرين يا حرمة ضروسي احس بها اصبري !
وهي تصبر .. وتصبر وهي ساكتة ؟ وشوي اقولها انتي اللحين دكتورة اسنان ؟
قالت اه دكتورة .. قلت طيب وش ذا الشي اللي نغزتية بفمي !؟
قالت ابرة بنج .. قلت زين يا دكتورة مامسك البنج وش الحل ؟
قالت بأجرب .. وهي تاخذ دريلها الله يلعن ابليسها وتحفر ويوم حفرت الا انفض رجلي قلت لعنبو بليسك انتي بتصلحين ضرس والا بتحفرين حفرية صرف صحي ! قالت طيب وهي تجيب ابرة ثانية وتضربها في فمي .. ولا مسك البنج !
وتضرب الأبرة الثالثة .. وبرضوه ماحسيت ببنجها
صكيت لها فمي وقلت لها يا دكتورة هذا مهوب بنج , اكيد ان اللي ضربتيه في فمي ابر سهال وشكلك غلطانة , قومي الله يعافيك ودوري لي بنج زي الناس ابي بنج يخدر له فيل ويخليه يرقد
قالت لامؤخزة يا اوستاز .. الا لما كُنت أشتغل في لندن .. قلت ايييه لندن اجل وش جابتس فيذا تشتغلين كان قعدتي هناك لأن ربعنا هنا ياكلون حصى وسنونهم ماتجيها شي كملت كلامها تقول ان اللي يجوني مخمورين وشاربين مخزي مايمسك معهم بنج ولازم تسع ابر بنج عشان يتخدروا !
قالت اوستازي انت بتشرب خمرة ؟ جاوبتها وانا اشتاط غضباً (( انا ولد الشايب ؟ اجل خمر يا بنت اللذينا ترجميني بخمر ؟ انا اوريتس واقوم من كرسيها وانا مافي بالي شي اسويه بس كذا ابي اروعها واقول من انتي اصلن يوم تقولين اني اشرب خمر ؟ وتشككين في نزاهتي وتشككين في اخلاقي ؟ راح وجه الدكتورة ستين قطعة وكأنة منشفة امي هذيك البرتقالية اللي بالمطبخ
قالت متأسفة انا ما أصدتش حاقة يا اوستاز .. حأك عليٌة قلت اللحين وش السواة معك اشتكيك عند المدير ؟ ليه تتهميني بخمر ؟ ذرقت الحرمة وودها انها ماقالت شي لأني معطيها وجه بالبداية ويقالها تبي تقولي اني اشرب خمر .. قلت اسمعي عشان اسكت عن كلمتك لازم تسوين لي دسكاون
يعني مافيه 600 ريال والله لو تسوين شركة اتصالات بفمي قالت ماشي قلت بأعطيك 350 ريال واحمدي ربك .. عشان المرة ثانية ماترجمين مراجعينك بالخمر وتصيرين اخلاق معهم وكلمة ورد غطاها .. قالت طيٌب البنج موش راضي يمسك قلت يا حرمة انا رجال اشرب سبع زمزميات شاهي باليوم ومسبب لأمي أزمة شاهي ماتوطى شي بغرفتي الا وتلزق لبتن شاهي برجلها قالت اها بئى كده , تشرب منبهات ! قلت ايه تراني ما ارقع لك يالخبلة ولانسيت كلمة خمر , علي الحرام ماتاخذين الا 350 ريال عشان كلمتك المخيسة ذي .. قالت ماشي يا باشا وانا متأسفة ..
وعقب ماضربتني الابرة الخامسة من البنج الا انا احس بفمي وبراطمي كأنها غطا موية .. ماعاد احس فيه ابد !
وانا اقولها يا حرمة انتي وش سويتي ؟ براطمي طاحت كأني من بعارين المزاحمية ! .. قالت متخفش ساعتين تلاتة وحيفوك بيأزن الله وهي تشتغل وتهندس بفمي وممرضتها المخيسة اللي معها عليها وجه كأنه معجون طماط .. ماغير تشفط سعابيلي تحت لساني وانا اسأل الممرضة ؟ اقولها ما أمتلت القربة اللي فيها سعابيل ؟ قالت لئه لسة .. قلت كويٌس
وهي تهندس بفمي وقربت تخلٌص , الا تجيب مسدس مدري وشو ويوم سألتها قالت هذا تثبيت حشوة بالليزر , قلت الهمام كمٌلي .. وهي تحط المسدس بفمي موجهته على الضرس وباقي المسدس على دقني واحس دقني متبنج ولاهوب معي ! واحس بحرارة بخدي ما ادري وشي ولا اهتميت للموضوع ..
يوم خلصت .. وانا اعطيها 350 ولقيت بجيبي عشرة ريال قلتي ذي عشانتس ولاعاد تكررينها تقولين خمر وماخمر والله لو درى ابوي ان يشك فيني ويطقة وسواس


* وأنا أطلع من عندها على الساعة عشر تقريباً .. والساعة 11 مافك البنج وفمي احسه طايح والساعة 12 برضوه نفس الكلام وانا ماغير اهرب سعابيل وحاط منديل على فمي عشان ما اتفشل قدٌام اللي يكلمني مافك بنجها الا على الساعة 2.30 الفجر .. حسيت انه راح مفعولة وانا انبسط .. الا شوي واحس بحرارة بخدي الا واروح اناظر المراية الا اشوف كم شعرة طايرة من سكسوكتي ومكانها احمر اثرها بنت اللذينا محرقتني بالليزر .. وطيرت سكسوكتي الله ياخذ ابليسها



كل اسبوع .. يوم جمعة , مع ولد جدٌي
يوم الجمعة عيد الأسبوع وعيد للمسلمين فيه الخير كلٌه واللي يستغل هاليوم كلٌه بساعات إجاباته عند الله شرط ان الاسبوع الجاي يصير مليونير وعنده فلوس وثلاجات للبيع
ألبس وأرسٌم واروح للمسجد , ودايم ولد جدٌي لا شافني بالمسجد يجي ويتسنن جنبي ويجلس
ولا جا الإمام يخطب .. ينغز ركبتي ويقول اسمع اسمع .. واناظر فيه واطنشة
ثم عقب خمس دقايق ينغز .. ويقول اسمع اسمع الامام .. مرة من المرات قلت له تراني اشغلتني يا مسلم انا وش مقعدني هنا يعني استهبل ؟ فكٌنا منك واسمع انت انا اسمع رجال اسمع وأتعظ اما انت تسمعها من هنا وتنطلها من هناك انت والثيٌل اللي تحت خشمك ..
ويوم يجي يتقهوى عندنا اروح ارقد وأفتك من نقتة هالشايب الأفصع


يجيني أحساس أحياناً .. وأشتاق لصباح
سبحان من بيده الأعمار ! هذيك الحرمة يالله تحرك يدها من الكبر ولهالحين تغني ..
كل من اعرس عليها خانها وسحب عليها ولهالحين الثقة موجودة انها الأجمل والأكشخ ..
لذلك عزيزتي القارئة ناظري وجهك بالمراية وتحمٌدي ربك انك توك ورعه .. صباح ضربت 90 سنة ولهالحين هي الأكشخ هي وشعرها أشقر وصوف !


مواقف ..

* واحد من خوياي قبل اسبوع قدر الله عليه وتوفت امه عسى الله يرحمها ويتقبلها عنده في فسيح جناته
جا من بكرة وانا فاضي قلت يا ولد خلني اروح للرجال وأقوم بالواجب معه .. يوم شغلت سيارتي وانا ادق عليه
أنا : مسيٌك بالخير يا ماجد ..
ماجد : الله يمسيك بالرضا ..
أنا : عظٌم الله أجركم والله يرحمها ويتقبلها عنده بواسع رحمته ..
ماجد : الله يجزاك خير ..
أنا : حبيبي وين بيتكم فيه ودٌي اعزي الوالد والأخوان ..
وصفي لي بيتهم حول طريق الخرج مهوب بعيد ..
أنا : زين جايك إن شاء الله

مع الطريق وانا مسرٌح وأفكاري توصل طريق القصيم وتجي .. وصلت طريق الخرج
ورحت لحيٌهم وأدق عليه .. ماجد الكبري الاول اتعداه ؟ قال لا ثاني كبري قلت زين واقفل
يوم وصلت الكبري الاول الا يجيني طريق خدمة مدري كيف جاي .. وانا اللي اضيع وانا اديور
وبرضوا ادق عليه .. ماجد مافيه كبري ؟ قال ارجع مع مخرج 18 وادخل معه ..
مع اللفلفة والدوخة .. وصلت حيٌهم
باقي اللحين أوصل لبيتهم .. انا سويت نفسي فاهم وقلت اكيد اي بيت عنده سيارات واجد هو بيتهم لأنه شي طبيعي بيكون فيه معزين وكذا
وانا أدور حارتهم وادور.. كل البيوت عندها سيارات واجد ! وانا اللي ينقلب مخي !
وادق عليه ماجد بيتكم وينه ؟ قال تلقاه عند الحديقة العامة قلت زين وانا اقفل
واشوف لي بزران بوسط الحارة يلعبون .. وانا اوقف عندهم واقولهم ؟ وين الحديقة العامة قالوا ارجع ورا بالشارع الثاني ..

وانا امشي من عندهم واديور .. وفقعت كورتهم اللي كانوا يلعبون فيها بالغلط !
وانا تطقني الحسوفة .. وكأني مادريت وامشي واخليهم
يوم وصلت الحديقة العامة .. وادق على ماجد واقوله انا عند الحديقة
قال شف بيتنا شرق من الحديقة .. وانا اروح شرق وادور بالبيوت وينقفل جوال ماجد فجأه ! وانا اللي اقعد ادور من عقب المغرب لين أذن العشا في الحارة ولقيت ماجد صدفة واقف على الباب ..
أكتشفت اخيراً , اني ادور على بيت ماجد من بعد المغرب .. وفي نفس المربع ادور عليه ..
قالي ماجد هو انت اللي يدور من اليوم ؟ قلت ايييه وهو يضحك ويقول يا اخي حسيت انه انت
حلالاة يا ماجد بس

نورت المنتدي

وأهلا بمشاركاتك معانا

ويارب تفيد وتستفيد

تقبل مروري